રાગ : સારંગ
પદ-૧
જમોને મારા નાથજી સારૂં સારૂં રે,
વિધવિધના મેં તો પાક બનાવ્યા, શાક કટોરા કેરી હારૂં રે. જમો૦ ૧
લાલ મનોહર માગીને લેજો, જે કાંઈ લાગે તમને પ્યારૂં રે. જમો૦ ૨
જગજીવન પોતાની રે જાણીને, કહેજો જે હોય ખાટું ખારૂં રે. જમો૦ ૩
બ્રહ્માનંદ કહે શીત પ્રસાદી, દીયો તો થાય કામ મારૂં રે. જમો૦ ૪
પદ-૨
આરોગો મારા નાથજી પ્રિતે પ્રિતે રે. આરોગો૦
ઓરડીઆ અંજવાળીને રાખ્યા, ચિત્ર કરાવ્યાં રૂડી ભીંતે રે. આરોગો૦ ૧
શ્યામળીયા રે નટવર તમ સારૂં, રસોઈ કરી છે રૂડી રીતે રે. આરોગો૦ ૨
પવન ઢોળીશ કર લઈને રે પંખો, ગાઈને રીઝાવું રૂડે ગીતે રે. આરોગો૦ ૩
બ્રહ્માનંદ કહે શીત પ્રસાદીથી, શાન્તિ થાય છે મારે ચિત્તે રે. આરોગો૦ ૪
પદ-૩
આરોગો મેવા નાથજી રૂડા રૂડા રે. આરોગો૦
શીરા પુરીને સેવૈયા, પુરણ પોળીને માલપુડા રે. આરોગો૦ ૧
બીરંજ કંસાર હરિસો બરફી, ઝબોળેલ રોટલીઓના ઝુડારે. આરોગો૦ ૨
ચોળા મગફળી છમકારી કાજુ, મેં તો તળેલ કંકોડા રે. આરોગો૦ ૩
બ્રહ્માનંદના નાથ તમારે કાજે, ઘૃતમાંહિ તળ્યાં છે ઘિસોડાં રે. આરોગો૦ ૪
પદ-૪
આવીને જમો નાથજી વારી વારી રે. આવીને૦
લાડુને પયપાક લાપસી, સેવ ઝીણી બાફીને ઉતારી રે. આવીને૦ ૧
ઘૃત તાજું તાવેલ ધરાઉં, થાળમાં ખીચલડી ઠારી રે. આવીને૦ ૨
પાપડ તળીયા મેં પ્રિત કરીને, ભજીયાં કર્યા છે સ્વાદુભારી રે. આવીને૦ ૩
બ્રહ્માનંદને શીત પ્રસાદી, દીજે વૃજરાજ વિહારી રે. આવીને૦ ૪